O‘zbekiston tashqi ishlar vaziri Baxtiyor Saidov Isroilning O‘zbekistondagi elchisi Gideon Lustig bilan uchrashib, Svi Koganning vafoti munosabati bilan “chuqur hamdardlik” bildirdi.
“O‘zbekiston xalqi barcha din va elat vakillariga azaldan do‘stona munosabatda bo‘lib kelgan. Biz millatchilikning hech qanday ko‘rinishiga toqat qilmaganmiz va bundan keyin ham toqat qilmaymiz. Terrorizm va ekstremizmning chegarasi va millati yo‘q. O‘zbekiston hukumati tergov jarayonlarida BAA va Isroil idoralari bilan yaqindan hamkorlik qilmoqda”, – deya ma’lum qildi Saidov.
Eslatib o‘tamiz, Dubayda bedarak yo‘qolgan 28 yoshli ravvin Svi Kogan keyinchalik Ummon bilan chegaradosh Al-Ayn shahrida o‘lik holda topilgan edi. BAA Ichki ishlar vazirligi uni o‘ldirishda gumon qilinib, hibsga olingan uch nafar gumonlanuvchi O‘zbekiston fuqarolari ekanini ma’lum qilgandi.
