Joriy yil boshidan buyon gazdan foydalanishda qoidalarga amal qilinmagani oqibatida respublikada 74 ta xavfli holat qayd etilgan. Bu haqda AOKAda o‘tkazilgan brifingda "Hududgazta’minot" AJ boshqarma boshlig‘i Abdusattor Qayumov ma’lum qildi.
Ma’lum qilinishicha, joriy yil boshidan bugungi kunga qadar Respublika bo‘yicha gaz bilan bog‘liq jami 74 ta holat sodir bo‘ldi. Buning oqibatida 82 nafar fuqaro vafot etgan. Bundan tashqari 80 kishi turli darajadagi tan jarohatlari oldi.
Ayrim holatlarda esa dudburon nosozligi oqibatida oilaning barcha a’zolari is gazidan zaxarlanib, vafot etdi.
Gaz bilan bog‘liq ko‘ngilsiz holatlar soni 2023 yilning shu davri bilan taqqoslaganda nisbatan kamaygan. 2023 yilda gaz bilan bog‘liq jami 86 ta holat sodir bo‘lib, unda 88 kishi vafot etgan, 119 nafari turli darajadagi tan jarohatlar olgan.
