O‘zbekistondagi Islom sivilizatsiyasi markazida davlatimiz madhiyasi qabul qilinganining 32 yilligiga bag‘ishlangan tadbir bo‘lib o‘tdi.
Tadbir “Ma’rifat karvoni” ilmiy-ma’rifiy targ‘ibot tadbirlari doirasida “Yurakni madh etgan sado!” shiori ostida o‘tkazildi.
Dastlab Mudofaa vazirligi musiqali orkestri va xor guruhi, tadbirga yig‘ilgan barcha qatnashchilar ijrosida O‘zbekiston milliy madhiyasi yangradi.
Mazkur tadbirda Respublika Ma’naviyat va ma’rifat markazi direktori Otabek Hasanov va O‘zbekistondagi Islom sivilizatsiyasi markazi direktori Firdavs Abduxoliqov, O‘zbekistonda xizmat ko‘rsatgan artist Gulbahor Erqulova, O‘zbekistondagi islom sivilizatsiyasi markazi ilmiy kotibi Rustam Jabborov, Siyosiy fanlar doktori, professor Narzulla Jo‘rayev, O‘zbekistonda xizmat ko‘rsatgan madaniyat xodimi, shoir Bobur Bobomurod nutq so‘zlashdi.
Davlat madhiyasi har bir mamlakatning mustaqilligi, kuch-qudrati, tarixiy qadriyatlari va ma’naviy dunyosini aks ettiradi. Bundan o‘ttiz uch ikki muqaddam millatimizning bosh qo‘shig‘i, madhiyamiz qabul qilingan edi. Shundan beri davlat madhiyasi Vatanimiz ozodligi, farovonligining ifodasi sifatida yangrab kelmoqda. Bu betakror taronani tinglaganda beixtiyor qalbimizda eng jo‘shqin tuyg‘ular jo‘sh uradi, – dedi O‘zbekistondagi Islom sivilizatsiyasi markazi direktori Firdavs Abduxoliqov. – Madhiyamizning har bir satri mustaqil Vatanimizning ma’lum bir qirrasini namoyon etadi. Unda ona diyorimizning go‘zal tabiati, xalqimizning azaliy qadriyatlari, qadimiy va boy tariximiz, bugungi kun va buyuk kelajagimiz tarannum etiladi. Zotan, har birimiz bu qo‘shiqni dilda saqlashimiz, mehr va muhabbat ila kuylashimiz, avaylab-asrashimiz zarur.
Tadbirda so‘zga chiqqan Siyosiy fanlar doktori, professor Narzulla Jo‘rayev O‘zbekiston respublikasi davlat madhiyasi tarixi, uning qabul qilinishi jarayoni haqidagi xotiralarni esga oldi.
Bugun O‘zbekistondagi islom sivilizatsiyasi hay’ati tomonidan xorijiy mamlakatlarda turli media-iventlar o‘tkazilmoqda. O‘zbekistonning xorijdagi madaniy merosi namunalarini har tomonlama o‘rganyapmiz. Yaqinda Buyuk Britaniyaning Oksford shahrida buyuk allomalarimiz yaratib qoldirgan qo‘lyozmalar bilan tanishdik. Qizig‘i, Angliyada astronomiya fani rivojlanishiga, Londondagi Grinvich observatoriyasining bunyod etilishiga ham aynan buyuk bobomiz Mirzo Ulug‘bek yaratgan "Ziji Ko‘ragoniy" jadvali, Ulug‘bek rasadxonasida ishlatilgan asbob-uskunalar ham katta rol o‘ynagan. Bugun madhiyamiz haqida so‘z yuritganda, "ajdodlar mardona ruhi senga yor" misrasi ana shu holatni eslatdi. Biz qayerga borsak ham buyuk ajdodlarimiz ruhi, ularning xotirasi biz bilan ekanini tushunib yetdim, – deydi O‘zbekistondagi islom sivilizatsiyasi markazi ilmiy kotibi Rustam Jabborov.
O‘zbekistonda xizmat ko‘rsatgan artist Gulbahor Erqulova ijrosidagi "Har tongda yangraydi madhiyam" qo‘shig‘iga barcha ishtirokchilar jo‘r bo‘lishdi.
"Ma’rifat karvoni” loyihasi bo‘yicha tadbirlar mamlakatimiz bo‘ylab davom etmoqda.
