Ma’muriy javobgarlik to‘g‘risidagi kodeksga kiritilayotgan o‘zgartirish va qo‘shimchalarga ko‘ra, jamoat transporti uchun alohida ajratilgan yo‘laklarda harakatlanish qoidalarini buzganlik uchun quyidagicha jarimalar nazarda kutilmoqda.
- Birinchi marta buzganda, bazaviy hisoblash miqdorining 3 baravari miqdorida jarima.
- Jazo qo‘llanilganidan keyin bir yil davomida takroran sodir etilsa, bazaviy hisoblash miqdorining 5 baravari miqdorida jarima.
- Shuningdek, yondosh hududdan chiqib, alohida ajratilgan yo‘lakni bo‘shatgan holda yo‘lning qatnov qismidan harakatlanayotgan transport vositalariga yo‘l bermaslik holatlariga BHMning 1 baravari miqdorida jarima belgilash nazarda tutilmoqda.
Oliy Majlis Qonunchilik palatasining majlisida birinchi o‘qishda ko‘rib chiqilgan ushbu qonun loyihasi qizg‘in muhokamalarga sabab bo‘ldi. Ayrim deputatlar jamoatchilikning fikr va e’tirozlaridan kelib chiqib, savol va takliflarni o‘rtaga tashladi.
Taksi haydovchilari yo‘lovchi olish va tushirish jarayonida bevosita ajratilgan yo‘laklarga kirib to‘xtashi ham huquqbuzarlik bo‘ladimi?
Mutasaddisi aynan shu holatlar bo‘yicha avtoturargohlar, to‘xtash joylarini tashkil etish choralari ko‘rilayotganini qayd etdi.
Qonunchilik palatasi Spikerining ta’kidlashicha, so‘nggi paytlarda Ichki ishlar vazirligining Yo‘l harakati xavfsizligi boshqarmasi tomonidan kiritilayotgan qonunchilik tashabbuslarining deyarli barchasida taqiqlovchi, chegaralovchi, jazoni kuchaytiruvchi tashabbuslar bo‘layapti, liberallashtiruvchi tashabbuslar kam.
Muhokamalarda so‘z olgan deputatlar qonun loyihasi jamoat transportini rivojlantirish, jamoat transportida yo‘lovchilarga sifatli va qulay xizmat ko‘rsatilishini tashkil etish, jamoat transporti harakati ustuvorligini hamda yo‘llarda harakat xavfsizligini ta’minlashga xizmat qilishini ta’kidladi.
Majlisda qonun loyihasi birinchi o‘qishda qabul qilindi
