Kolumbiyaning Kauka departamenti hududida yuz bergan kuchli portlash oqibatida 14 kishi halok bo‘ldi, yana kamida 38 kishi jarohat oldi. Hodisa Panamerika shossesida odamlar gavjum paytda sodir bo‘lgan.
Hudud gubernatori Oktavio Gusman X ijtimoiy tarmog‘ida ma’lum qilishicha, jabrlanganlar orasida 5 nafar voyaga yetmaganlar ham bor. Portlash yo‘l infratuzilmasiga, ayniqsa Panamerika shossesiga jiddiy zarar yetkazgan. Gubernator halok bo‘lganlar yaqinlariga hamdardlik bildirib, jarohatlanganlarga zarur yordam ko‘rsatilayotganini ta’kidladi.
Kolumbiya prezidenti Gustavo Petro ushbu hujumni keskin qoralab, uni sodir etganlarni «terrorchilar, fashistlar va narkosavdogarlar» deb atadi. U xalqaro hamjamiyatni bu guruhlarga qarshi kurashni kuchaytirishga chaqirib, ularning moliyaviy manbalarini aniqlash va yo‘q qilish zarurligini bildirdi.
Rasmiylar hodisa yuzasidan tergov ishlarini olib bormoqda.
