Bugun, 16 dekabr kuni Yevropa Ittifoqi tashqi ishlar vazirlari “gibrid faoliyat” deb nomlanuvchi harakatlari uchun Rossiyaga qarshi birinchi sanksiyalar borasida kelishib olishadi. Bu haqda Polskie Radio radiostansiyasi o‘z qo‘liga tushgan hujjatga tayanib xabar bergan.
Ma’lumotlarga ko‘ra, sanksiyalar Rossiyaning razvedka xizmatlari hamda huquqni muhofaza qiluvchi idoralar vakillari, ekspertlar va jurnalistlarga nisbatan qo‘llaniladi.
Qayd etilishicha, ro‘yxat 16 kishidan iborat bo‘lib, unga asosan Rossiya hamda Gruziya va Moldova fuqarolari kiritilgan. Sanksiyalarga duchor bo‘lgan shaxslarning ism-shariflari ularning cheklovlardan bo‘yin tovlashiga yo‘l qo‘ymaslik uchun oshkor etilmaydi. Ushbu cheklovlar ularning Yevropa Ittifoqiga kirishini taqiqlash, aktivlarini muzlatish va Yevropa Ittifoqi tomonidan moliyalashtirishini cheklashdan iborat bo‘ladi.
Bundan tashqari, ro‘yxatga Bryusselning so‘zlariga ko‘ra, “Yevropada qo‘poruvchilik faoliyati” va “dezinformatsiya tarqatish” bilan shug‘ullanuvchi uchta tashkilot ham kiritilgan.
Eslatib o‘tamiz, 8 oktyabr kuni Yevropa Ittifoqi Rossiyaga nisbatan xorijdagi “gibrid harakatlar” va “saylovlarga aralashgani” uchun yangi sanksiyalar mexanizmini tasdiqladi. Ro‘yxat Rossiya Federatsiyasidan neft tashuvchi xorijiy tankerlarga qarshi choralarni nazarda tutuvchi Rossiyaga qarshi sanksiyalarning 15-paketi bilan deyarli bir vaqtda tasdiqlangan.
Yevropa Ittifoqi davlatlarining doimiy vakillari 11 dekabr kuni Rossiyaga qarshi sanksiyalarning navbatdagi paketini kelishib olgan edi. Cheklovlar Rossiya “Katta yettilik” davlatlari” va ularning hamkorlari tomonidan o‘rnatilgan eng yuqori neft narxi cheklovini chetlab o‘tish uchun yaratgan "xufyona tankerlar floti"ga qarshi kurashishga qaratilgan
Noyabr oyida Reuters agentligi sanksiyalar Rossiya uchun uchuvchisiz parvoz apparatlari ishlab chiqaradigan Xitoy kompaniyalariga ham ta’sir qilishi haqida xabar bergan edi.
