Бугун, 16 декабрь куни Европа Иттифоқи ташқи ишлар вазирлари “гибрид фаолият” деб номланувчи ҳаракатлари учун Россияга қарши биринчи санкциялар борасида келишиб олишади. Бу ҳақда Polskie Radio радиостанцияси ўз қўлига тушган ҳужжатга таяниб хабар берган.
Маълумотларга кўра, санкциялар Россиянинг разведка хизматлари ҳамда ҳуқуқни муҳофаза қилувчи идоралар вакиллари, экспертлар ва журналистларга нисбатан қўлланилади.
Қайд этилишича, рўйхат 16 кишидан иборат бўлиб, унга асосан Россия ҳамда Грузия ва Молдова фуқаролари киритилган. Санкцияларга дучор бўлган шахсларнинг исм-шарифлари уларнинг чекловлардан бўйин товлашига йўл қўймаслик учун ошкор этилмайди. Ушбу чекловлар уларнинг Европа Иттифоқига киришини тақиқлаш, активларини музлатиш ва Европа Иттифоқи томонидан молиялаштиришини чеклашдан иборат бўлади.
Бундан ташқари, рўйхатга Брюсселнинг сўзларига кўра, “Европада қўпорувчилик фаолияти” ва “дезинформация тарқатиш” билан шуғулланувчи учта ташкилот ҳам киритилган.
Эслатиб ўтамиз, 8 октябрь куни Европа Иттифоқи Россияга нисбатан хориждаги “гибрид ҳаракатлар” ва “сайловларга аралашгани” учун янги санкциялар механизмини тасдиқлади. Рўйхат Россия Федерациясидан нефт ташувчи хорижий танкерларга қарши чораларни назарда тутувчи Россияга қарши санкцияларнинг 15-пакети билан деярли бир вақтда тасдиқланган.
Европа Иттифоқи давлатларининг доимий вакиллари 11 декабрь куни Россияга қарши санкцияларнинг навбатдаги пакетини келишиб олган эди. Чекловлар Россия “Катта еттилик” давлатлари” ва уларнинг ҳамкорлари томонидан ўрнатилган энг юқори нефть нархи чекловини четлаб ўтиш учун яратган "хуфёна танкерлар флоти"га қарши курашишга қаратилган
Ноябрь ойида Reuters агентлиги санкциялар Россия учун учувчисиз парвоз аппаратлари ишлаб чиқарадиган Хитой компанияларига ҳам таъсир қилиши ҳақида хабар берган эди.
