“O‘zbekkosmos” agentligi tomonidan ekologiya yo‘nalishida o‘tkazilgan bu yilgi kosmik monitoring davomida mamlakatimiz bo‘yicha 720 gektardan ziyod maydonni egallagan 1 ming 928 ta noqonuniy chiqindixona borligi aniqlangan.
Misol tariqasida esa Qoraqalpog‘iston Respublikasida 243 ta, Xorazm viloyatida 168 ta, Buxoro viloyatida 92 ta noqonuniy chiqindi poligonlari aniqlanganini keltirish mumkin. Bunday poligonlar boshqa hududlarda ham mavjud.
SSV xabariga ko‘ra, noqonuniy chiqindi poligonlari inson salomatligi uchun xavf solar ekan, ularga huquqiy baho berish ayni muddaodir.
Qayd etilishicha, chiqindilar ekologiyaga jiddiy salbiy ta’sir ko‘rsatishidan tashqari, inson salomatligi uchun katta xavf tug‘diradi. Aniq aytadigan bo‘lsak, zararli hasharotlar ko‘payib, yuqumli kasalliklarga chalinish holatlari ortadi va insonlarda o‘pka saratoni hamda nafas olish nuqsonlari paydo bo‘ladi.
