Ukraina dronlarining Moskva shahri va viloyatiga uyushtirgan keng ko‘lamli hujumlaridan bir necha soat o‘tgach, Saudiya Arabistonida Ukrainada tinchlik bo‘yicha muzokaralar boshlandi.
AQSH va Ukraina delegatsiyalari bugun Saudiya Arabistonining Jidda shahrida, Ritz-Carlton mehmonxonasida tinchlik muzokaralarini boshladi. Muzokaralarda Kiyev nomidan Ukraina tashqi ishlar vaziri Andrey Sibixa va mudofaa vaziri Rustem Umerov ishtirok etmoqda. Vladimir Zelenskiy muzokaralarda qatnashmayapti.
AQSH delegatsiyasiga AQSH davlat kotibi Marko Rubio boshchilik qilmoqda, u muzokaralardagi eng yuqori martabali Amerika vakili hisoblanadi. Shuningdek, Trampning milliy xavfsizlik bo‘yicha maslahatchisi Uols ham delegatsiya tarkibidi.
Ukraina prezidenti ofisi rahbari Andriy Yermak muzokaralar davom etayotgan suratlarni "X" ijtimoiy tarmog‘ida e’lon qildi. Uning so‘zlariga ko‘ra, delegatsiyalar Jiddada "faol ish boshlagan".
Keyingi bayonotida u muzokaralar "juda konstruktiv tarzda" boshlanganini ta’kidladi.
AQSH vakillari Ukraina tinchlikka erishish uchun "murakkab qadamlar" tashlashga tayyormi-yo‘qmi" ekanligini bilib olishni istamoqda.
Bu haqda AQSH davlat kotibi Marko Rubio ma’lum qildi. U bugungi muzokaralarda ishtirok etayotgani bilan birga, o‘tgan oy Riyozda Amerika va Rossiya vakillari o‘rtasida bo‘lgan muzokaralarda ham qatnashgan.
Rubio jurnalistlarga, agar Ukraina va AQSH o‘zaro kelishuvga erisha olsa va bu Donald Tramp uchun maqbul bo‘lsa, AQSH yangi ma’muriyati tinchlik muzokaralarini jadallashtirishi mumkinligini bildirdi.
"Biz bu yerdan shunday xulosa bilan chiqishimiz kerakki, Ukraina ham, Rossiya ham urushni tugatish uchun og‘ir qarorlar qabul qilishga tayyor bo‘lishi lozim", — dedi u.
Rubio Ukrainaga hech qanday shart qo‘ymasligini, ammo Kiyev qay darajada tayyor ekanligini bilib olish muhimligini qayd etdi.
"Biz ular qanchalik yo‘lga tayyor ekanligini tinglaymiz va buni rossiyaliklar talablari bilan solishtiramiz. Ana shunda biz haqiqiy farqni aniq ko‘ra olamiz."
Muzokaralar oldin Rubio “Ukraina hududlarini qaytarib olishi imkonsizligi, ayrim hududiy vozkechishlarga tayyor turishi kerakligi” haqida bayonot bergan edi.
Ikki yuqori martabali ukrain manbasiga ko‘ra, Kiyev muzokaralarda Qora dengizda va uzoq masofaga uchadigan raketalardan zarba berish bo‘yicha vaqtinchalik o‘t ochishni taklif qiladi.
Shuningdek, muzokaralarga asirlarni almashish masalasi ham kiritilgan.
Associated Press agentligiga ko‘ra, Ukraina muzokaralar doirasida AQSH bilan strategik muhim minerallar bo‘yicha kelishuv imzolashga ham tayyor.
Ukraina prezidenti ofisi rahbari Andriy Yermak Telegram sahifasida Ukraina "urushni tugatish bo‘yicha aniq konsepsiya" bilan muzokaralarga kirishganini ma’lum qildi.
Kiyev, shuningdek, AQSHni o‘tgan haftada to‘xtatilgan harbiy yordam va razvedka ma’lumotlari almashish jarayonini qayta tiklashga undamoqchi.
AQSH davlat kotibi Marko Rubio ta’kidlashicha, agar Ukraina tinchlik jarayoniga qat’iy kirishishni va’da qilsa, bu ikki masala qayta ko‘rib chiqilishi mumkin.
"Yordam to‘xtatilgani sababi — biz Ukraina muzokaralarga jiddiy yondashmayapti, deb hisoblagan edik. Agar bu o‘zgarsa, AQSH siyosati ham o‘zgarishi ehtimoli yuqori."
Rubio muzokaralardan katta natija kutayotganini va tinchlik jarayonida yangi bosqichga o‘tishga umid qilayotganini qo‘shimcha qildi. "Men umid qilamanki, ertaga yaxshi muzokaralar o‘tkazamiz va vaziyatni boshqacha nuqtayi nazardan ko‘rib chiqamiz.", degan AQSH Davlat kotibi.
Tak’idalsh kerak, AQSH rasmiylari Kiyevning chaqiriqlariga qaramay, Ukrainaning 2014 yoki 2022 yillardagi chegaralarni tiklash talablarini muhokama qilishni istamayapti.
Muzokaralar davom etmoqda.
Abdulloh Sayyid
