Kecha Fransiya Madaniyat vazirligida O‘zbekiston Madaniyat va san’atni rivojlantirish jamg‘armasi raisi Gayane Umerovaga "San’at va adabiyot" (Ordre des Arts et des Lettres) ordeni kavaleri nishonini topshirish marosimi bo‘lib o‘tdi, deb xabar qilmoqda "Dunyo" AA.
Fransiya madaniyat vaziri Rashida Dati taqdirlash marosimidagi nutqida Prezident Shavkat Mirziyoyev rahnamoligida O‘zbekistonda madaniyat sohasini rivojlantirish borasida amalga oshirilayotgan izchil davlat siyosatini e’tirof etish borobarida, bu Fransiya bilan strategik sheriklik munosabatlarini mustahkamlashga xizmat qilayotganini ta’kidladi.
"Ushbu yuksak mukofot O‘zbekistonning xalqaro madaniy aloqalarni mustahkamlash va san’at sohasida global muloqotni rivojlantirishga qo‘shgan sa’y-harakatlari va hissasining e’tirofidir. Hukumat, Prezident ma’muriyati va Fransiya Tashqi ishlar vazirligi, diplomatik korpus vakillari, madaniyat arboblari va xalqaro hamkorlar ishtirokida O‘zbekiston vakilining ushbu orden bilan taqdirlangani Yangi O‘zbekiston madaniy diplomatiyasi samaradorligining yorqin dalilidir", - dedi vazir Rashida Dati.
Eslatib o‘tamiz, Gayane Umerova O‘zbekistondagi Islom sivilizatsiyasi markazi ilmiy kengashi a’zosi hisoblanadi.
So‘nggi yillarda O‘zbekiston va Fransiya o‘rtasidagi madaniyat va san’at sohasidagi hamkorlik bir qator muhim tashabbuslar – Luvrda o‘zbek merosiga oid keng ko‘lamli ko‘rgazmadan tortib, xalqaro madaniy anjumanlarda faol ishtirok etishgacha bo‘lgan ishlar tufayli yangi bosqichga ko‘tarildi.
Shu nuqtayi nazardan, davlatimiz rahbari tashabbuslarini amalga oshirishda ustuvor loyihalarni amalga oshirayotgan O‘zbekiston madaniyati va san’atini rivojlantirish jamg‘armasi muhim o‘rin tutmoqda.
"San’at va adabiyot" ordeni kavaleri nishoni Fransiyada, shuningdek, butun dunyoda san’at va adabiyotning gullab-yashnashiga qo‘shgan xizmatlarini taqdirlash uchun har yili dunyo bo‘ylab 60ga yaqin kishiga beriladi.
O‘zbekistondagi Islom sivilizatsiyasi markazi jamoasi Gayane Umerovani ushbu yuksak e’tirof bilan chin dildan muborakbod etadi.
