Turkiyada ota-onasi qaramog‘idan mahrum bo‘lgan voyaga yetmagan qiz O‘zbekistonga qaytarildi. Bu haqda Ijtimoiy himoya milliy agentligi ma’lum qildi.
Qayd etilishicha, O‘zbekistonning Turkiyadagi elchixonasiga kelib tushgan ma’lumotlar asosida xorijda ota-onasi qaramog‘idan mahrum bo‘lgan voyaga yetmagan qizni vatanga qaytarish chora-tadbirlari boshlangan.
Oila va xotin-qizlar qo‘mitasi va elchixonaning sa’y harakatlari natijasida qiz 15-aprel kuni Toshkent xalqaro aeroportida mas’ul xodimlar tomonidan kutib olingan.
“Hozirda qiz Toshkent shahri voyaga yetmaganlarga ijtimoiy-huquqiy yordam ko‘rsatish markaziga vaqtincha joylashtirilgan. Joylashtirishning muqobil shakli belgilangunga qadar qizga ushbu markazda zarur ijtimoiy-huquqiy yordam ko‘rsatish rejalashtirilgan”,— deyiladi xabarda.
Shuningdek, voyaga yetmagan bolalarning doimiy ro‘yxatdan o‘tgan joyidagi “Inson” ijtimoiy xizmatlar markazlari olib kelinayotgan bolalarni oilaviy muhitga qaytarish bo‘yicha chora-tadbirlar ko‘rilayotgani qo‘shimcha qilingan.
