Туркияда ота-онаси қарамоғидан маҳрум бўлган вояга етмаган қиз Ўзбекистонга қайтарилди. Бу ҳақда Ижтимоий ҳимоя миллий агентлиги маълум қилди.
Қайд этилишича, Ўзбекистоннинг Туркиядаги элчихонасига келиб тушган маълумотлар асосида хорижда ота-онаси қарамоғидан маҳрум бўлган вояга етмаган қизни ватанга қайтариш чора-тадбирлари бошланган.
Оила ва хотин-қизлар қўмитаси ва элчихонанинг саъй ҳаракатлари натижасида қиз 15 апрель куни Тошкент халқаро аэропортида масъул ходимлар томонидан кутиб олинган.
“Ҳозирда қиз Тошкент шаҳри вояга етмаганларга ижтимоий-ҳуқуқий ёрдам кўрсатиш марказига вақтинча жойлаштирилган. Жойлаштиришнинг муқобил шакли белгилангунга қадар қизга ушбу марказда зарур ижтимоий-ҳуқуқий ёрдам кўрсатиш режалаштирилган”,— дейилади хабарда.
Шунингдек, вояга етмаган болаларнинг доимий рўйхатдан ўтган жойидаги “Инсон” ижтимоий хизматлар марказлари олиб келинаётган болаларни оилавий муҳитга қайтариш бўйича чора-тадбирлар кўрилаётгани қўшимча қилинган.
