Joriy yilning 16-aprel kuni Rossiyaning Saratov viloyati Dergachevskiy tumanida o‘zbekistonliklar ishtirokida YTH ro‘y berdi. Bu haqda O‘zbekistonning Qozon shahridagi Bosh konsulxonasi ma’lum qildi.
Qayd etilishicha, hodisa soat 01:10 da viloyatning Tambov-Penza-Saratov-Pristannoye-Yershov-Ozinki trassasida sodir bo‘lgan. “Lada Largus” avtomashinasida bo‘lgan O‘zbekiston fuqarolari va trassada turgan, “Volvo” shatakchisi tarkibidagi “Autogalantas” yuk avtoulovi ishtirokida yo‘l-transport hodisasi qayd etilgan.
Oqibatda 1 nafar O‘zbekiston fuqarosi — yo‘lovchi, 1987-yilda tug‘ilgan K.F.Z. voqea joyida vafot etgan. 5 nafar o‘zbekistonlik (1968-yilda tug‘ilgan haydovchi, shuningdek, yo‘lovchilar — 2005 va 1991-yillarda tug‘ilgan erkaklar, 1980 va 2002-yillarda tug‘ilgan ayollar) turli jarohatlar bilan tuman shifoxonasiga joylashtirilgan.
Davlat avtoinspeksiyasining Saratov viloyati boshqarmasi to‘qnashuvdan so‘ng yengil avtomobil yonib ketganini ochiqladi.
“Holat Bosh konsulxona nazoratida. Vafot etgan fuqaroning jasadini vatanga qaytarish ishlari boshlangan, jabrlanganlarga tibbiy muolaja ko‘rsatilmoqda”— , deyiladi xabarda.
