Turkiyaning Istanbul shahri Kadikoy tumanida 19 yoshli O‘zbekiston fuqarosi ijarada turgan uyida chiqqan yong‘in sabab vafot etdi. Bu haqda mamlakatning Istanbuldagi bosh konsulxonasi xabar qildi.
Marhumning jasadini O‘zbekistonga yuborish bilan bog‘liq barcha xarajatlar O‘zbekiston Respublikasi Vazirlar Mahkamasi huzuridagi Migratsiya agentligi tomonidan to‘liq qoplab berildi.
Shu o‘rinda, ijtimoiy tarmoqlarda ayrim shaxslar tomonidan marhumni O‘zbekistonga yuborish uchun yordam puli yig‘ilayotgani haqidagi yolg‘on va asossiz ma’lumotlar tarqatilmoqda. Konsulxona fuqarolarimizni bu kabi noto‘g‘ri xabarlarga ishonmaslikka va rasmiy manbalarga tayanishga chaqiradi.
Fursatdan foydalanib, Bosh konsulxona kuni kecha qabul qilingan O‘zbekiston Respublikasi Vazirlar Mahkamasining 252-sonli "O‘zbekiston fuqarolarini xorijda tashkil etilgan tartibda ishga joylashtirish tizimini yanada takomillashtirish chora-tadbirlari to‘g‘risida"gi Qaroriga muvofiq, endilikda chet elda bo‘lgan davrida vafot etgan O‘zbekiston fuqarolarining jasadini Vatanga qaytarish bilan bog‘liq xarajatlar davlat tomonidan qoplanishini ma’lum qiladi.
Diplomatik idora, shuningdek, chet elda bo‘lgan davrida vafot etgan O‘zbekiston fuqarolarining jasadini vatanga qaytarish bilan bog‘liq xarajatlar davlat tomonidan qoplanishini eslatib o‘tdi.
