AQSh vitse-prezidenti Jey Di Vens Ukrainadagi urush yuzasidan ogohlantiruvchi bayonot berdi. Unga ko‘ra, agar mojaro to‘xtatilmasa, urush yillar davom etishi mumkin va bu holat “yadroviy urushga” olib kelish xavfiga ega.
“Ukrainaliklar urushda yutmaydi”
Vens amerikalik podkaster Charli Kirk bilan suhbatda shunday dedi:
“Agar bu to‘xtamasa, ukrainaliklar urushda yutmaydi. OAVda urush yana yillar davom etsa, Rossiya qulaydi degan umid bor, lekin bu haqiqiy emas.”
Demografik inqiroz va millionlab qurbonlar xavfi
Siyosatchining aytishicha, urush davom etsa, Rossiya va Ukraina jiddiy demografik muammolarga duch keladi. Eng og‘iri – yana millionlab insonlar halok bo‘lishi mumkin.
Muzokaralar yuzasidan ehtiyotkor optimizm
Vens, Donald Trampga yaqin bo‘lgan siyosiy arbob sifatida, AQSh ma’muriyati urushni to‘xtatishga intilayotganini ta’kidladi. U o‘zining muzokaralar borasidagi optimizmi hozir avvalgiga qaraganda kuchayganini ham aytdi.
