AQSH sobiq prezidenti Jo Baydenga prostata saratonining agressiv shakli tashxisi qo‘yilgan bo‘lib, uning 12 oydan 18 oygacha umri qolgan bo‘lishi mumkin. Bu haqda Oq uyning sobiq shifokori, respublikachi kongressmen Ronni Jekson ma’lum qildi.
O‘zi nima bo‘lgan edi?
Baydenning matbuot kotibi joriy yilning 18-may kuni Bayden chalingan tashxisni haqiqat ekanligini tasdiqladi va kasallikni davolash mumkinligini ta’kidladi.
Biroq Jeksonning so‘zlariga ko‘ra, muvaffaqiyatli davolanishga umid qilinsa-da, prognozlar tashvishli bo‘lib qolmoqda.
“Bu mening mutaxassisligim emas, lekin bu ma’lum bo‘lganidan beri ko‘plab urologlar bilan suhbatlashdim va ularning barchasi uning 12 oydan 18 oygacha umri qolishi mumkinligi haqida bir fikrga kelishdi. Umid qilamanki, vaqt ko‘proq bo‘ladi va ishonamanki, ular bu kasallikni samarali davolay oladi. U hali ko‘p yillar yashaydi. Lekin bu juda ilgarilab ketgan kasallik”, — deydi Ronni Jekson.
Bayden qachondan kasallik bilan kurashardi?
Avvalroq onkolog Ezekiel Emanuel kasallikning rivojlanishi Baydenning 2021-yildagi prezidentlik muddati boshidayoq boshlangan bo‘lishi mumkinligini taxmin qilgandi.
Ushbu bayonotlar siyosatchining haqiqiy sog‘lig‘i yashirilgan bo‘lishi mumkinligi haqidagi jamoatchilik shubhalarini kuchaytirdi. Ayniqsa, Oq uyning 2024-yil fevral oyidagi tibbiy hisobotida prostata bezida hech qanday muammo yo‘qligi, aksincha, Baydenning sog‘lig‘i “yaxshi” ekani ta’kidlangani e’tiborga molik.
Ma’lumot uchun, Oq uyning sobiq rahbari hozir 82 yoshda. 2024-yilda u tez-tez adashib gapirishi, unutuvchanligi va omma oldida yiqilishlari tufayli jismoniy va aqliy holatiga shubhalar ortib borayotgan bir paytda prezidentlik poygasidan chiqishga majbur bo‘ldi.
