Qo‘shma Shtatlar 2025 yil 1 iyuldan boshlab Ukrainadagi USAID (AQSH Xalqaro Taraqqiyot Agentligi) loyihalari doirasida faoliyat yuritayotgan qator xodimlar bilan shartnomalarni bekor qilmoqda. Bu haqda TASS agentligi AQSH davlat xaridlari portalidagi rasmiy hujjatlarga tayanib xabar berdi, deya yozmoqda "Zamon.uz".
Ishdan bo‘shatilayotganlar gumanitar va rivojlanish sohasida ishlagan mutaxassislardir. Ular orasida iqtisodiy o‘sish bo‘yicha katta maslahatchi, global sog‘liqni saqlash xavfsizligi bo‘yicha ekspert, donorlarni muvofiqlashtirish bo‘yicha maslahatchi va boshqa ko‘plab malakali kadrlar bor. Shuningdek, ba’zilari Donald Trampning oldingi prezidentlik davrida ishga qabul qilingan.
Xodimlar bilan tuzilgan shartnomalar turli muddatli va turli miqdorda bo‘lgan. Ulardan eng yuqori mablag‘li shartnoma – aloqa bo‘yicha katta maslahatchiga tegishli bo‘lib, qiymati 455 ming AQSH dollarini tashkil etgan.
Rasmiy hujjatlarda ishdan bo‘shatish sababi “hukumat manfaatlari uchun” deb ko‘rsatilgan. Bu ibora, Ilon Musk nazorati ostidagi samaradorlikni oshirish agentligi tomonidan standart asosda ishlatiladi. Ushbu asosda bo‘shatilgan xodimlar kompensatsiya olish huquqiga ega bo‘lishi mumkin, biroq bu holat shartnomaviy tafsilotlarga bog‘liq.
Avvalroq, AQSH Davlat kotibi Marko Rubio AQSHning xorijdagi yordam dasturlarini tanqid qilib, “ularning ko‘pchiligi samarasiz” ekanini va atigi 12 foiz mablag‘gina haqiqiy ehtiyojmandlarga yetib borishini bildirgandi.
Bu qaror Ukraina bilan hamkorlikdagi rivojlanish dasturlariga qanday ta’sir ko‘rsatishi hozircha aniq emas, biroq u USAID loyihalarining qisqarishidan dalolat beradi.
