Rossiya Prezidenti Vladimir Putin jahon sarmoyadorlarini Peterburg xalqaro iqtisodiy forumida (PMEF) ishontira olmadi. G‘arb kompaniyalari Rossiya bilan ishlash xavfini hisobga olib, bu yilgi forumda deyarli ishtirok etmadi. Bu haqda “The Financial Times” nashri xabar berdi.
Ma’lum qilinishicha, Rossiyaning eng yaqin ittifoqchilari ham bu yil Sankt-Peterburgga odatdagidan pastroq darajadagi delegatsiyalarni yuborgan. Yagona istisno — Indoneziya. Bu mamlakat forumga prezident darajasida — Prabovo Subianto boshchiligida tashrif buyurgan.
“Carnegie fondining” Berlindagi Rossiya va Yevrosiyo bo‘yicha markazi ilmiy xodimi Aleksandra Prokopenkoga ko‘ra, Rossiyaga bugungi sharoitda sarmoya kiritish haqida umuman gap bo‘lishi mumkin emas.
“Urush, sanksiyalar, iqtisodiy o‘sishning sustlashuvi va doimiy inflyatsiya sharoitida kim Rossiyaga sarmoya kiritadi?” — degan Prokopenko.
Rossiya Moliya vazirligi ma’lumotiga ko‘ra, har oy o‘nlab xorijiy kompaniyalar Rossiya bozorini tark etish uchun ariza bermoqda. Bunday holat, RBK agentligiga bergan intervyusida moliya vaziri o‘rinbosari Ivan Chebeskov aytishicha, G‘arb sanksiyalarining davom etayotgani va Ukraina frontidagi holat Putinning tinchlikka tayyor emasligini ko‘rsatmoqda.
“The Financial Times” bu fonni hisobga olgan holda, Rossiyaga nisbatan sanksiyalar yaqin orada olib tashlanmasligini ham ta’kidlagan.
