AQSh prezidenti Donald Tramp Fransiyada bo'lib o'tgan G7 sammiti doirasida Hindiston bosh vaziri Narendra Modi bilan ikki tomonlama uchrashuv o'tkazdi. Suhbat davomida Tramp kelajakda Hindistonga tashrif buyurishini ma'lum qildi.
Uning aytishicha, AQSh va Hindiston o'rtasidagi savdo kelishuvi bo'yicha muzokaralar ham yakunlanish arafasida.
Ikki davlat o'rtasidagi munosabatlar o'tgan yili Trampning Hindiston mahsulotlariga boj joriy etish rejasi ortidan taranglashgan edi. O'tgan hafta esa Ummon ko'rfazida AQSh harbiylari tomonidan uch nafar hind dengizchisining halok bo'lishi vaziyatni yanada murakkablashtirdi.
Modi G7 sammitida Tramp bilan uchrashuv chog'ida Hormuz bo'g'ozida faoliyat yuritayotgan hind dengizchilarining xavfsizligi masalasini ko'tardi.
Shuningdek, tomonlar savdo kelishuvi bo'yicha muzokaralarni ham muhokama qildi. Bu jarayon AQShning majburiy mehnatga qarshi etarli chora ko'rmayotgan davlatlarga, jumladan Hindistonga nisbatan yangi import bojlari joriy etishi sababi sekinlashgan.
Tramp jurnalistlar bilan muloqotda Narendra Modini "qattiq muzokarachi" deb atadi va yaqin kelajakda Hindistonga borish niyati borligini bildirdi.
Shuningdek, u AQShning Hindiston bilan mudofaa sohasidagi hamkorligi haqida gapirar ekan, mamlakatga tashqi tahdid bo'lgan taqdirda Vashington yordam berishga tayyorligini ta'kidladi.
"Agar kimdir unga hujum qilsa, biz yordam beramiz. Yangi rahbar kelsa, bu haqda hozircha aniq ayta olmayman", — dedi Tramp.
Hindistonda muxolifat partiyalari bosh vazir Modini AQSh harakatlarini ochiq tanqid qilmagani uchun tanqid qildi. Ular Tramp bilan uchrashuvda mazkur masalani qat'iy ko'tarishni talab qildi.
Modi G7 sammitidagi nutqida Yaqin Sharqdagi mojaro tufayli bir necha nafar Hindiston fuqarosi halok bo'lganini eslab o'tdi va dengizchilar xavfsizligini ta'minlash muhimligini ta'kidladi.
