Oq uyda o‘tgan Pasxa tushligi chog‘ida AQSh prezidenti Donald Trump kutilmagan bayonot berib, Jey Di Vensning Eron urushiga yakun yasash bo‘yicha muzokaralardagi roliga izoh berdi.
“Agar bu amalga oshmasa, men Jey Di Vensni ayblayman”, dedi Trump. Ushbu gaplar tadbir ishtirokchilari orasida kulgiqa sabab bo‘ldi. Tadbirda vitse-prezident, davlat kotibi Marko Rubio hamda mudofaa vaziri Pit Hegset kabi yuqori lavozimli amaldorlar ham qatnashgan. Trump, shuningdek, “agar muvaffaqiyat qozonilsa, barcha yutuqni o‘zimga olaman”, deya qo‘shimcha qildi.
Mazkur bayonot Vensning hozirgi vazifasini yaqqol namoyon etdi. U Pokistonda Eron bilan muzokaralar olib borayotgan AQSh delegatsiyasiga rahbarlik qilmoqda. Bu esa uning vitse-prezident sifatidagi eng murakkab vazifalaridan biri sifatida baholanmoqda.
Qayd etilishicha, Vensning Islomoboddagi diplomatik missiyasi ancha murakkab bo‘lib, u olti hafta davom etgan harbiy harakatlardan so‘ng bir-biriga ishonmaydigan tomonlar o‘rtasida kelishuvga erishishi kerak. Mazkur mojaro Yaqin Sharqdagi vaziyatni keskinlashtirib, jahon iqtisodiyotiga ham ta’sir ko‘rsatgan.
Manbalarga ko‘ra, AQShning ittifoqchilari Vens faoliyatini diqqat bilan kuzatmoqda. Yevropa rasmiylaridan biri uning bu jarayonda aniq natija ko‘rsatishi zarurligini ta’kidlab, “aks holda u siyosiy jihatdan zaiflashishi mumkin”, degan.
