Toshkent shahrida ichki ishlar tizimi mansabdori firibgarlik va pora olishda gumonlanib, qo‘lga olindi. Bu haqda DXX Darakchi.uz'ga ma’lum qilindi.
Ma’lumotlarga ko‘ra, Mirzo Ulug‘bek tumanidagi IIO faoliyatini muvofiqlashtirish boshqarmasi bo‘linma boshlig‘i, podpolkovnik unvonidagi U.S. Jinoyat kodeksining 273-moddasi bilan ayblanayotgan shaxsga nisbatan qamoq ehtiyot chorasi o‘rniga garov qo‘llanilishini va’da qilgan. Buning evaziga ayblanuvchining qarindoshidan 18 000 AQSH dollari olgan.
Ammo va’dasini bajara olmagan mansabdor, pulning bir qismini qaytarmoqchi bo‘lgan paytda ashyo dalillari bilan ushlandi.
Hozirda unga nisbatan Jinoyat kodeksining 168-moddasi (firibgarlik) va 211-moddasi (pora olish) bilan ish qo‘zg‘atilgan. Qamoq ehtiyot chorasi qo‘llanilgan. Tergov ishlari davom etmoqda.
