Bugun, 4 avgust kuni prezident Shavkat Mirziyoyev Turkmaniston yetakchisi Serdar Berdimuhamedovning taklifiga binoan mamlakatga uchib ketdi. Bu haqda prezident matbuot xizmati ma'lum qildi.
Qayd etilishicha, Oʻzbekiston yetakchisi BMTning Dengizga chiqish imkoni boʻlmagan rivojlanayotgan mamlakatlar boʻyicha uchinchi konferensiyasida ishtirok etish uchun amaliy tashrif bilan ushbu mamlakatga joʻnab ketgan.
Avazada boʻlib oʻtadigan konferensiyada transport jihhatidan oʻzaro bogʻliqlikni mustahkamlash va savdo tartib-taomillarini soddalashtirish, iqtisodiy transformatsiya, iqlim oʻzgarishiga va atrof-muhit uchun xatarlarga bardoshlilikni oshirish, Barqaror rivojlanish maqsadlariga erishish masalalari koʻrib chiqiladi. Avaza siyosiy deklaratsiyasi va harakatlar dasturining qabul qilinishi koʻzda tutilgan.
Shuningdek, prezident Markaziy Osiyo davlatlari rahbarlarining yettinchi maslahat uchrashuviga tayyorgarlik koʻrish masalalariga bagʻishlangan tadbirda ishtirok etadi va qator ikki tomonlama muzokaralar oʻtkazadi.
