Ozarbayjon va Armaniston yetakchilari bir necha o‘n yillik mojarolardan so‘ng AQSh vositaschiligida ikki tomonlama iqtisodiy aloqalarni kuchaytiruvchi tinchlik bitimini imzoladi, deb xabar bermoqda "Reuters" axborot agentligi.
- Tomonlar 35 yil mobaynida o‘zaro ziddiyatda bo‘lib kelishdi, endi esa ular uzoq vaqt do‘st bo‘lib qolishadi, - dedi Trump Oq uy qarorgohida.
Aslida, ikki o‘lka o‘rtasidagi mojaro 1980 yillarning oxirida, asosan, etnik armanlar istiqomat qiladigan Tog‘li Qorabog‘ning Armaniston ko‘magida Ozarbayjondan ajralib chiqqanidan so‘ng boshlangan. Ozarbayjon 2023 yilda usbu hududni to‘liq nazorat ostiga oldi va natijada yuz minglab armanlar Armanistonga qochib ketishga majbur bo‘ldi.
Trumpning aytishicha, ikki davlat nizoni butkul to‘xtatish, diplomatik munosabatlarni qayta yo‘lga qo‘yish va bir-birining hududiy yaxlitligini hurmat qilish majburiyatini olgan.
Qiziq jihati, Ozarbayjon prezidenti Ilhom Aliyev va Armaniston Bosh vaziri Nikol Pashinyan Trumpni mojaroga barham berishda yordam bergani uchun olqishlab, uni Tinchlik uchun "Nobel" mukofotiga nomzod qilib ko‘rsatishlarini aytdi.
- Prezident Trump bo‘lmasa, kim "Nobel" mukofotiga loiq?" — dedi Aliyev.
Donald Trump prezidentlik lavozimidagi ikkinchi muddatining dastlabki oylarida o‘zini global tinchlikparvar shaxs sifatida ko‘rsatishga harakat qilib keladi. Oq uy uni Kambodja va Tailand o‘rtasida o‘t ochishni to‘xtatish, shuningdek, Ruanda va Kongo Demokratik Respublikasi, Pokiston va Hindiston o‘rtasida tinchlik bitimlarini imzolashda muhim rol o‘ynagan shaxs deb hisoblaydi. Biroq Qo‘shma Shtatlar rahbari haligacha Ukraina - Rossiya va Isroil - HAMAS ziddiyatlarini to‘xtata olganicha yo‘q.
