Озарбайжон ва Арманистон етакчилари бир неча ўн йиллик можаролардан сўнг АҚШ воситачилигида икки томонлама иқтисодий алоқаларни кучайтирувчи тинчлик битимини имзолади, деб хабар бермоқда “Reuters” ахборот агентлиги.
- Томонлар 35 йил мобайнида ўзаро зиддиятда бўлиб келишди, энди эса улар узоқ вақт дўст бўлиб қолишади, - деди Трамп Оқ уй қароргоҳида.
Аслида, икки ўлка ўртасидаги можаро 1980 йилларнинг охирида, асосан, этник арманлар истиқомат қиладиган Тоғли Қорабоғнинг Арманистон кўмагида Озарбайжондан ажралиб чиққанидан сўнг бошланган. Озарбайжон 2023 йилда ушбу ҳудудни тўлиқ назорат остига олди ва натижада юз минглаб арманлар Арманистонга қочиб кетишга мажбур бўлди.
Трампнинг айтишича, икки давлат низони буткул тўхтатиш, дипломатик муносабатларни қайта йўлга қўйиш ва бир-бирининг ҳудудий яхлитлигини ҳурмат қилиш мажбуриятини олган.
Қизиқ жиҳати, Озарбайжон президенти Илҳом Алиев ва Арманистон Бош вазири Николь Пашинян Трампни можарога барҳам беришда ёрдам бергани учун олқишлаб, уни Тинчлик учун “Нобель” мукофотига номзод қилиб кўрсатишларини айтди.
- Президент Трамп бўлмаса, ким “Нобель” мукофотига лойиқ?" — деди Алиев.
Дональд Трамп президентлик лавозимидаги иккинчи муддатининг дастлабки ойлариданоқ ўзини глобал тинчликпарвар шахс сифатида кўрсатишга ҳаракат қилиб келади. Оқ уй уни Камбоджа ва Таиланд ўртасида ўт очишни тўхтатиш, шунингдек, Руанда ва Конго Демократик Республикаси, Покистон ва Ҳиндистон ўртасида тинчлик битимларини имзолашда муҳим рол ўйнаган шахс деб ҳисоблайди. Бироқ Қўшма Штатлар раҳбари ҳалигача Украина - Россия ва Исроил - ҲАМАС зиддиятларини тўхтата олганича йўқ.
