Afgʻonistonning Kunar va Nangarhor viloyatlarida sodir boʻlgan kuchli zilzila oqibatida kamida 812 kishi halok boʻlgani aytilmoqda. Rasmiy maʼlumotlarga koʻra, yana 2800 nafar odam jarohatlangan.
“Tolibon” maʼmuriyati xalqaro hamjamiyatdan shoshilinch yordam soʻramoqda. Reuters agentligi xabar berishicha, qutqaruv ishlari togʻli hududlar va yomgʻirli ob-havo sabab murakkab sharoitda olib borilmoqda.
Ayrim aholi punktlari bilan aloqa uzilgan, yoʻllar yopilgani bois yordam hali hammaga yetib bormagan. Tolibon maʼmuriyati va BMT mutasaddilari qurbonlar soni yana oshishi mumkinligini maʼlum qilgan. Afgʻonistonga hozircha faqat Xitoy va Hindiston tomonidan amaliy yordam vaʼda qilingan.
“Tolibon” hukumati xalqaro yordamchilarning sust faoliyatini tanqid qilmogʻda. Bu — 2021 yilda “Tolibon” hokimiyatga kelganidan beri yuz bergan uchinchi yirik zilzila. Mavjud vaziyatda moliyaviy va texnik resurslari cheklangan maʼmuriyat xalqaro hamjamiyatdan faolroq koʻmak soʻramoqda.
