Kongo Respublikasining Kasayi provinsiyasida Ebola virusi holatlari ko'paygani sababli epidemiya e'lon qilindi. Bu haqda Jahon sog'liqni saqlash tashkiloti (JSST) xabar berdi.
Ma'lum qilinishicha, Kasayi provinsiyasining Bulape va Mveka sog'liqni saqlash zonlarida kamida 28 nafar bemorda virus gumon qilinmoqda. 15 kishi vafot etgan, ulardan 4 nafari tibbiyot xodimlaridir.
Kasallik belgilari sifatida isitma, qusish, ich ketishi va qon ketishi holatlari qayd etilgan. 3 sentabr kuni poytaxt Kinshasadagi Milliy biotibbiyot tadqiqot institutida olingan namunalarda Ebola virusi – xususan, Ebola Zaire turi aniqlandi. Epidemiya qarshi kurash uchun milliy tezkor javob guruhi, JSSTning epidemiologiya, infektsiyani nazorat qilish, laboratoriya va kasallikni boshqarish mutaxassislari provinsiyaga yuborilgan.
Shuningdek, mahalliy aholiga virus haqida tushuntirish ishlarini olib borilmoqda. Mamlakatga 2 tonna tibbiy jihozlar, shaxsiy himoya vositalari, mobil laboratoriya uskunalari etkazilishi rejalashtirilgan.
Poytaxt Kinshasada hozirda ushbu virusga qarshi samarali hisoblangan Ervebo vaktsinasi zaxirada mavjud bo'lib, 2000 doza yaqin orada Kasayi provinsiyasiga etkaziladi. Vaktsina, eng avvalo, tibbiyot xodimlari va kasallar bilan aloqada bo'lganlar uchun mo'ljallangan.
“Biz virus tarqalishini to'xtatish va aholini himoya qilish uchun qat'iy choralar ko'ryapmiz. Kongo bu kabi epidemiyalarni jilovlash borasida katta tajribaga ega. Sog'liqni saqlash rasmiylari bilan yaqin hamkorlikda muhim choralarni tez fursatda kengaytiramiz”,— deydi JSST Afrika mintaqaviy direktori doktor Muhammad Janabiy.
Ebola – kam uchraydigan, ammo juda xavfli va o'lim bilan yakunlanishi mumkin bo'lgan virusli kasallik. Virus ko'rshapalaklardan odamga yuqadi, keyinchalik esa kasallangan odamlarning qon va tana suyuqliklari orqali insondan-insonga o'tadi.
