Markaziy bank avgust oyida ayrim qoidabuzarliklar uchun 9 ta bankka sanksiya qo‘lladi. Bu haqda bank matbuot xizmati xabar berdi.
Bildirilishicha, bank nazorati qo‘mitasi tomonidan 2025 yilning avgust oyidagi yig‘ilishlarida 51 ta masala ko‘rib chiqilgan va tegishli qarorlar qabul qilingan.
Unga ko‘ra, o‘tkazilgan inspektsiya tekshiruvlari davomida qoidabuzarliklar uchun 9 ta bank, 6 ta mikromoliya tashkiloti va 4 ta lombardga nisbatan jarima sanksiyasi qo‘llanilgan.
Shuningdek, normativlarga rioya etilmaganligi, muammoli kreditlarni undirish va qoldig‘ini kamaytirish yuzasidan reja-grafiklar ijrosi bajarilmaganligi tufayli 14 ta bank va 2 ta to‘lov tashkiloti ham sanksiyalar qo‘llanishidan ogohlantirilgan.
Ustav kapitalining eng kam miqdorini shakllantirilishi bo‘yicha qonunchilik talablariga rioya qilinmaganligi uchun 1 ta bankka berilgan litsenziya chaqirib olingan.
