Марказий банк август ойида айрим қоидабузарликлар учун 9 та банкка санкция қўллади. Бу ҳақда банк матбуот хизмати хабар берди.
Билдирилишича, банк назорати қўмитаси томонидан 2025 йилнинг август ойидаги йиғилишларида 51 та масала кўриб чиқилган ва тегишли қарорлар қабул қилинган.
Унга кўра, ўтказилган инспекция текширувлари давомида қоидабузарликлар учун 9 та банк, 6 та микромолия ташкилоти ва 4 та ломбардга нисбатан жарима санкцияси қўлланилган.
Шунингдек, нормативларга риоя этилмагани, муаммоли кредитларни ундириш ва қолдиғини камайтириш юзасидан режа-графиклар ижроси бажарилмаганлиги туфайли 14 та банк ва 2 та тўлов ташкилоти ҳам санкциялар қўлланишидан огоҳлантирилган.
Устав капиталининг энг кам миқдорини шакллантирилиши бўйича қонунчилик талабларига риоя қилинмаганлиги учун 1 та банкка берилган лицензия чақириб олинган.
