Oʻzbekiston OTMlariga kirolmagan abiturientlar uchun qoʻshimcha qabul-ochiladi. Unda 56,7 ball va undan yuqori natija koʻrsatgan, biroq talabalikka tavsiya etilmagan abiturientlar ishtirok etishi mumkin. Bu haqda Oliy taʼlim vazirligi xabar qildi.
Maʼlum qilinishicha, 2025/2026-oʻquv yili uchun qabul jarayonlari 25 sentyabrdan 3 oktyabrgacha (shu kuni ham) amalga oshiriladi. Unga koʻra, 2025-yilgi kirish imtihonlarida 56,7 ball va undan yuqori natija koʻrsatgan, biroq talabalikka tavsiya etilmagan, shu jumladan, roʻyxatdan oʻtishning ikkinchi bosqichida-oliy taʼlim tashkiloti va bakalavriat taʼlim yoʻnalishlarini tanlamagan abiturientlarga quyidagi imkoniyatlar yaratiladi:
Davlat oliy taʼlim tashkilotlarida qolgan vakant bakalavriat taʼlim yoʻnalishlariga tanlovda ishtirok etish uchun 2025 yil 25 sentyabrdan 3 oktyabrgacha (shu kuni ham) my.uzbmb.uz sayti orqali online
roʻyxatdan oʻtish imkoniyati yaratiladi;
roʻyxatdan oʻtgan abiturientlar toʻplagan ballari ketma-ketligiga qatʼiy rioya qilingan holda vakant oʻrinlarga bazaviy toʻlov-kontrakt asosida talabalikka tavsiya etiladi;
roʻyxatdan oʻtish jarayonida fanlar majmuasi mos boʻlgan bakalavriat yoʻnalishini tanlash imkoniyati beriladi;
Tanlov natijalari boʻyicha qaydnomalar 2025 yil 8 oktyabrgacha chop etilib, tegishli oliy taʼlim tashkilotlariga talabalikka qabul qilish boʻyicha hujjatlarni rasmiylashtirish uchun yetkaziladi.
Umumiy qabul parametrlarida vakant oʻrinlar qolgan bakalavriat taʼlim yoʻnalishlari boʻyicha maʼlumotlar Bilim va malakalarni baholash agentligining rasmiy veb-saytida eʼlon qilinadi.
