AsosiyJamiyat

Toʻrtta viloyatda mansabdorlar pora bilan qoʻlga tushdi

Namangan, Farg'ona, Samarqand va Toshkentda bir guruh mansabdorlar pora olgan vaqtida ashyoviy dalillar bilan ushlangandi.

'Toʻrtta viloyatda mansabdorlar pora bilan qoʻlga tushdi'ning rasmi

O‘zbekiston xalqaro arbitraj va hakamlik sudlarini rivojlantirish jamoat fondi huzuridagi doimiy faoliyat ko‘rsatuvchi Namangan viloyati hakamlik sudi sudyasi Chust tumanida yashovchi shaxsga mazkur tumanning “Mustaqillik” MFYdagi 6 sotix yer maydonida joylashgan, qurilishi tugallanmagan bahsli noturar binoga egalik huquqini beruvchi hal qiluv qarorini chiqarib berish evaziga 3200 AQSh dollarini talab qiladi.

Davlat xavfsizlik xizmati va Bosh prokuratura huzuridagi Departament xodimlari hamkorligida o‘tkazilgan tezkor tadbirda hakamlik sudi sudyasi ushbu pul mablag‘ini olgan vaqtida ashyoviy dalillar bilan ushlandi.

DHX va IJKKD xodimlari hamkorligida o‘tkazilgan boshqa tezkor tadbirda esa Farg‘ona viloyati Veterinariya va chorvachilikni rivojlantirish boshqarmasi bosh mutaxassisi O‘zbekiston tumanidagi chorvachilik bilan shug‘ullanuvchi fermer xo‘jalikning naslchilik toifasiga o‘tkazilganligi to‘g‘risida guvohnoma rasmiylashtirib berganligi evaziga mazkur xo‘jalikning ish boshqaruvchisidan 500 AQSh dollarini olgan vaqtida ushladi.

Dastlabki surishtiruv tadbirlari davomida bosh mutaxassis ushbu pul mablag‘ini viloyat Veterinariya va chorvachilikni rivojlantirish boshqarmasi boshlig‘ining o‘rinbosariga berishi kerakligi ma’lum bo‘lib, tezkor tadbir davom ettirildi va mazkur mansabdor shaxs 300 AQSh dollarini olgan vaqtida ushladi.

Samarqand viloyatida kuzatilgan holatda, Pastdarg‘om tumanida buxgalteriya xizmatlari ko‘rsatish faoliyati bilan shug‘ullanuvchi MChJ rahbari 2 nafar fuqarolarni ishonchiga kirib, ularni o‘zi buxgalteriya ishini olib borayotgan korxonalarning go‘yoki ishchi xodimi bo‘lganliklari haqida soxta ma’lumotlar kiritish orqali ish stajlarini ko‘paytirib, har biriga 2,5 million so‘mdan pensiya tayinlanishini “Inson” ijtimoiy xizmatlar markazi Pastdarg‘om tuman bo‘limi xodimi bilan hal qilib, nafaqaga chiqarib berish evaziga 2000 AQSh dollarini talab qiladi.

Davlat xavfsizlik xizmati hamda Bosh prokuratura huzuridagi Departament xodimlari tomonidan o‘tkazilgan tezkor tadbirda MChJ rahbari kelishilgan puldan 1900 AQSh dollarini olgan vaqtida ushladi.

Bunday qonunbuzilishi poytaxtimizda ham qayd etilib, xususan, Toshkent shahar kanallardan foydalanish va ularga tutash hududlarni obodonlashtirish boshqarmasining 2 nafar bo‘lim boshlig‘i o‘z xizmat mavqeilaridan foydalangan holda, qurilish firmasi tomonidan Bo‘zsuv kanali hududiga to‘kilgan chiqindi tuproqlar uchun 60 million so‘m miqdorida jarima qo‘llanishi yuzasidan dalolatnoma rasmiylashtirmaslik va kelgusida rahnamolik qilish evaziga tamagirlik yo‘li bilan 30 million so‘m olgan vaqtlarida ashyoviy dalillar bilan ushladi.

Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda, deyiladi DHX xabarida.

    Boshqa yangiliklar