Bunday holatlar qonun ustuvorligiga putur yetkazib, adolat tamoyillarining buzilishiga hamda davlat organlari faoliyati shaffofligi va samaradorligining pasayishiga olib keladi.
Ma'lum bo'lishicha, O'simliklar karantini va himoyasi agentligining Toshkent viloyati boshqarmasi inspektori o'z xizmat mavqeini suiiste'mol qilib, noqonuniy boylik ortitirishga uringan.
U Toshkent shahrida yashovchi 1995 yilda tug'ilgan fuqaroga tegishli 7 turdagi, jami 187 dona qadoqda bo'lgan mineral o'git mahsulotlarini "Navoiy" chegarа bojxona posti orqali o'tkazib berish evaziga 20 mln so'm talab qilgan.
Mazkur holat Davlat xavfsizlik xizmati xodimlari tomonidan Bojxona qo'mitasi Shaxsiy xavfsizlik boshqarmasi bilan hamkorlikda o'tkazilgan tezkor tadbir davomida fosh etildi.
Inspektor so'ralgan mablag'ni Toshkentning Olmazor tumanida olgan vaqtida ashyoviy dalillar bilan ushlangan.
Unga nisbatan jinoyat ishi qo'zg'atilib, qamoq ehtiyot chorasi qo'llanilgan. Tergov harakatlari davom etmoqda.
