Illinoys shtati hukumatı va Chikago shahri AQSh prezidenti Donald Trump ma'muriyatiga qarshi federal sudga da'vo arizasi kiritdi. Ular Trump tomonidan shtatga Milliy gvardiyaning 300 nafar a'zosini yuborish qarori noqonuniy deb hisoblamoqda. Bu haqda “Zamon.uz” nashri xabar berdi.
Da'voda qayd etilishicha, federal qo'shinlarni Illinoysga kiritish “konstitutsiyaga zid, xavfli va siyosiy sabablarga asoslangan” deb baholangan. Shuningdek, Trumpning ilgari Illinoys va Chikago rahbariyatiga nisbatan “tahdid va haqoratomuz” bayonotlar bergani ham tilga olingan.
Da'vogarlar suddan Milliy gvardiya a'zolarini “noqonuniy federalashtirishni” to'xtatishni so'ragan. Arizada ayblanuvchilar sifatida Trump, ichki xavfsizlik vaziri Kristi Noem va mudofaa vaziri Pit Hegset ko'rsatilgan.
Oq uy 5 oktyabr kuni prezidentning Milliy gvardiya kuchlarini “mahalliy hokimiyat nazorat qila olmayotgan tartibsizliklarni to'xtatish” maqsadida Illinoysga yuborish to'g'risidagi qarorini e'lon qilgan edi.
Illinoys gubernatori Jey Pritsker bu qarorni “Amerika qadriyatlariga zid” deb atadi va Oq uyni shtat aholisi ustidan “tajovuzkorlik bilan nazorat o'rnatishga urinishda” aybladi.
