Pokiston shimoli-g‘arbida qurollangan jangarilar bilan bo‘lgan to‘qnashuvda 11 nafar harbiy xizmatchi halok bo‘ldi. Bu haqda Al Jazeera xabar berdi.
Bildirilishicha, qurolli to‘qnashuv 8 oktyabr kuni Afg‘oniston chegarasi yaqinidagi Orazay tumanida yuz bergan. Harbiylar razvedka operatsiyasini amalga oshirayotgan bo‘lgan. Rey davomida “Tehrike Tolibon Pokiston” guruhi jangarilari bilan “shiddatli” otishma boshlandi. Mazkur guruh hujum uchun javobgarlikni o‘z zimmasiga olgan.
Qurbonlar orasida podpolkovnik Junayd Orif, uning o‘rinbosari mayor Tayyab Rahat va yana 9 nafar askar bor. Pokiston armiyasi ma’lumotiga ko‘ra, 19 nafar jangari o‘ldirilgan. Jangarilar dastlab yo‘l chetiga o‘rnatilgan bomba bilan harbiylar karvoniga hujum qilgan, so‘ngra ularga qarata o‘t ochgan.
Pokiston bosh vaziri Shahboz Sharif xavfsizlik kuchlarining xizmatlarini alohida ta’kidlab, halok bo‘lgan askarlar xotirasiga hurmat bajo keltirgan.
