Покистон шимоли-ғарбида қуролланган жангарилар билан бўлган тўқнашувда 11 нафар ҳарбий хизматчи ҳалок бўлди. Бу ҳақда Al Jazeera хабар берди.
Билдирилишича, қуролли тўқнашув 8 октябрь куни Афғонистон чегараси яқинидаги Оракзай туманида юз берган. Ҳарбийлар разведка операциясини амалга ошираётган бўлган. Рейд давомида “Теҳрике Толибон Покистон” гуруҳи жангарилари билан “шиддатли” отишма бошланган. Мазкур гуруҳ ҳужум учун жавобгарликни ўз зиммасига олган.
Қурбонлар орасида подполковник Жунайд Ориф, унинг ўринбосари майор Тайяб Раҳат ва яна 9 нафар аскар бор. Покистон армияси маълумотига кўра, 19 нафар жангари ўлдирилган. Жангарилар дастлаб йўл четига ўрнатилган бомба билан ҳарбийлар карвонига ҳужум қилган, сўнгра уларга қарата ўт очган.
Покистон бош вазири Шаҳбоз Шариф хавфсизлик кучларининг хизматларини алоҳида таъкидлаб, ҳалок бўлган аскарлар хотирасига ҳурмат бажо келтирган.
