Nepalning shimoli-sharqidagi Dolaha tumonida joylashgan Yalung Ri tog'ida 4 noyabr kuni soat 09:00 da (GMT bo'yicha 03:15) qor ko'chki yuz berdi.
Seven Summit Treks ekspeditsiya agentligi ma'lumotiga ko'ra, hodisada jami yetti alpinist halok bo'lgan — ularning orasida ikki italiyalik, biri kanadalik, biri germaniyalik, biri fransuz va ikki nafar nepalik yo'lko'rsatuvchi bor.
Qutqaruvchilar hozirgacha ikki jasodni topgan, qolganlari esa qor ostida qolib ketgan bo'lishi mumkinligi aytilmoqda. Sakkiz kishi tirik holatda qutqarilgan, ular poytaxt Katmanduga etkazilib, tibbiy yordam ko'rsatilmoqda.
Seven Summit Treks rahbari Minma Sherpaning so'zlariga ko'ra, qolgan besh jasod 3–4,5 metr chuqurlikda bo'lishi mumkin, bu esa qidiruv jarayonini murakkablashtirgan.
Hududdagi yomon ob-havo va logistik muammolar tufayli qutqaruvchilar voqea joyiga vertolyot orqali ham, piyoda ham etib bora olmagan.
Kathmandu Post yozishicha, halok bo'lganlar 6332 metr balandlikdagi Dolma Khang cho'qqisiga chiqishga tayyorlanayotgan bo'lgan, Yalung Ri tog'iga chiqish esa iqlimga moslashish mashg'ulotlarining bir qismi edi.
Shuningdek, mamlakatning g'arbiy qismida joylashgan Panbari tog'ida ham ikki italiyalik alpinist bedarak yo'qolgan, ularni izlash ishlari davom etmoqda.
So'nggi haftalarda “Monta” siklonI sababli butun Nepal bo'ylab kuchli yomg'ir va qor yog'ishi kuzatilib, suv toshqinlari va ko'chkilarga sabab bo'ldi.
