Davlat xavfsizlik xizmati xabariga ko‘ra, Toshkent viloyati Soliq boshqarmasining sayyor soliq tekshiruvlari bo‘limi katta inspektori xizmat mavqeidan foydalangan holda Angren shahrida faoliyat yurituvchi fermer xo‘jaligidan pora talab qilgan.
U o‘tkazilayotgan soliq tekshiruvini “ijobiy hal qilish” hamda bir yil davomida soliq organlari tomonidan qayta tekshiruv o‘tkazilmasligi evaziga xo‘jalik rahbaridan 5 ming AQSh dollarini so‘ragan.
Davlat xavfsizlik xizmati va Bosh prokuratura huzuridagi Departament xodimlari tomonidan Ohangaron tumanida o‘tkazilgan tezkor tadbirda inspektor ushbu pulni olayotganida ashyoviy dalillar bilan qo‘lga olingan.
Hozirda holat yuzasidan unga nisbatan Jinoyat kodeksining 210-moddasi (pora olish) 2-qismi bilan jinoyat ishi qo‘zg‘atilib, tergov harakatlari olib borilmokda.
