Ichki ishlar vazirligi huzuridagi Kiberxavfsizlik markazi endilikda “ishonchsiz” banklar reytingini e’lon qilib boradi. Bu haqda markaz vakili Maqsudjon Mirabdullayev 3 noyabr kuni bo‘lib o‘tgan matbuot anjumanida ma’lum qildi.
Yangi tartibga ko‘ra, har yil yakunida eng ko‘p kiberjinoyatlar qayd etilgan banklar va to‘lov tashkilotlari ro‘yxati ochiqlanadi. Bu orqali fuqarolar mablag‘larining xavfsizligi va axborot tizimlarining ishonchliligi haqida jamoatchilikka ochiq ma’lumot beriladi.
Mutasaddinning so‘zlariga ko‘ra, endi moliya muassasalari kiberhujumlarning oldini olish va axborot tizimlarini himoya qilishda yanada faolroq ishlashga majbur bo‘ladi.
