Boʻjxona qoʻmitasi maʼlumotiga koʻra, Namangan viloyati boʻjxona boshqarmasining "Namangan aeroporti" chegaraviy boʻjxona postida mobil qurilmalarni respublikaga noqonuniy olib kirish boʻyicha bir nechta holatlar aniqlandi.
Quvaytdan uchib kelgan yoʻlovchilar guruhi oʻzlariga tegishli boʻlmagan, umumiy qiymati 160 million soʻmlik 8 ta iPhone 17 telefonini boshqa shaxsning iltimosiga koʻra olib oʻtishga uringan. Ular boʻjxona nazorati vaqtida toʻxtatilgan.
Jiddadan qaytgan yoʻlovchilar bilan bogʻliq ikki holatda ham shunday urinishlar kuzatilgan. Umra ziyoratidan qaytayotgan yoʻlovchilardan biri 5 ta iPhone 17’ni yashirincha olib kirishga harakat qilgan, boshqa bir fuqaro esa 10 ta telefonni yoʻlovchilarga tarqatib, "shaxsiy ehtiyoj uchun" degan bahona bilan boʻjxonadan oʻtkazishni rejalashtirgan.
Ammo u aeroport avtoturargohida telefonlarni yigʻib olayotgan paytda fosh qilingan. Hozirda usbu holatlar boʻyicha boʻjxona tekshiruvlari davom ettirilmokda.
