Qozog‘iston Sog‘liqni saqlash vaziri Oqmoral Alnazarovaning ma’lumot berishicha, o‘tgan hafta kasallanish darajasi o‘tgan mavsumning xuddi shu davriga nisbatan 16 foizga oshgan. 1 sentyabrdan buyon mamlakatda 1,4 millionga yaqin ORVI holati qayd etilgan bo‘lib, ularning 66 foizini 14 yoshgacha bo‘lgan bolalar tashkil etmoqda.
Mamlakat bo‘ylab rinovirus, parainflyuenza, adenovirus, bokavirus, koronavirus, RS-virus va metapnevmovirus keng tarqalgan. Shuningdek, bolalar va homilador ayollar uchun xavfli hisoblangan "Gonkong grippi" shtammi ham aniqlangan — mavsum boshidan buyon qariyb 600 ta holat qayd etilgan.
Sharqiy Qozog‘iston, Abay va Qo‘stanay viloyatlarida bir qator maktablar vaqtinchi masofaviy ta’limga o‘tkazilmogda. Sharqiy Qozog‘istonda 23 maktabning 169 ta sinfida 3 mingdan ortiq o‘quvchi uydan ta’lim olmogda. Abay viloyatida ham ORVI bilan kasallangan bolalar soni ortishi ortidan ayrim sinflar onlayn o‘qishga o‘tkazilgan. Qo‘stanay viloyatida esa 72 ta sinfda darslar bekor qilingan.
Bosh vazir O‘ljas Bektenov Sog‘liqni saqlash vazirligi va mahalliy hokimiyatlarga tibbiy yordam sifatini kuchaytirish yuzasidan ko‘rsatma berdi.
