Andijon viloyatining Shahrixon tumanida o‘tkazilgan ekologik reyd vaqtida buzilgan tandirning qiyimati tuman hokimi tomonidan qoplab berilgan. Bu haqda Shahrixon tumani hokimining birinchi o‘rinbosari Rahmatillo Razzakov ma’lum qildi.
Unga ko‘ra, tuman hokimi ko‘rsatmasi bilan umumiy ovqatlanish ob’ektlarida yo‘l chetida noqonuniy o‘rnatilgan tandirlar bo‘yicha reyd o‘tkazilgan. Tadbir davomida bitta tandir buzilgan, yana ikkita tandir esa ichkariga ko‘chirilib, hozirda foydalanilmoqda. "Buzilgan tandir pulini hokim o‘z cho‘ntagidan to‘lab berdi", — dedi Razzakov.
Biroq tuman hokimligi o‘zining rasmiy sahifalarida e’lon qilgan videoda uchta turli ko‘rinishdagi tandirning buzilgani aks etgan, bu esa rasmiy ma’lumotlar bilan farq qiladi.
