UEFA Germaniyaning "Bavariya" klubini muxlislar bilan bog‘liq tartib-buzarliklar sabab 116 ming yevro miqdorida jarimaga tortdi hamda Chempionlar ligasi doirasidagi kelgusi uy uchrashuvi uchun stadionning ayrim sektorlarini yopish qarorini chiqardi.
Ma’lum qilinishicha, jazo dekabr oyida "Sporting"ga qarshi bahsda muxlislar tomonidan jamoat yo‘llarining to‘sib qo‘yilgani va tartibsizliklar yuzaga kelgani bilan bog‘liq. Ushbu holat avval shartli tarzda baholangan bo‘lsa-da, UEFA jazoni ijroga qaratishga qaror qilgan.
Shu sababli, 21 yanvar kunida "Union"ga qarshi bo‘lib o‘tadigan Chempionlar ligasi uchrashuvida "Alyans Arena" stadionining 111–114-sektorlari yopiq bo‘ladi. Stadionni qisman yopish bo‘yicha qo‘shimcha jazo ham belgilangan, biroq u ikki yillik sinov muddati bilan vaqtincha to‘xtatib turildi.
Bundan tashqari, noyabr oyida "Arsenal"ga qarshi safardagi o‘yindan keyin yuzaga kelgan tartibsizliklar uchun ham "Bavariya" jarimaga tortilgan. UEFA nemis klubini olomon orasida tartibsizliklar sodir etilgani va buyumlar uloqtirilgani uchun 40 ming yevro, sport tadbiriga mos kelmaydigan xabarlar tarqatilgani uchun esa 30 ming yevro jarima bilan jazolagan.
