Namangan viloyatida “Ko‘mir ta’minot” MChJ viloyat filiali boshlig‘i o‘rinbosariga nisbatan jinoyat ishi qo‘zg‘atildi. U yuqori lavozimdagi tanishlari orqali fuqaroni tuman ko‘mir ombori rahbari lavozimiga tayinlash hamda omborga keluvchi ko‘mir ortigan yuk vagonlari sonini ko‘paytirib berish evaziga 40 ming AQSh dollari talab qilgan.
Tergov ma’lumotlariga ko‘ra, 6 dekabr kuni mansabdor so‘ralgan pulning 25 ming dollarini olib, fuqaroni ombor mudiri lavozimiga tayinlashni ta’minlagan. Keyinchalik u qolgan 15 ming dollar va qo‘shimcha ravishda 30 ta vagon uchun ulush sifatida 7,5 ming dollar — jami 22,5 ming dollar talab qilgan.
Mazkur pul mablag‘ini vosita orqali olayotgan vaqtida Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan noqonuniy harakatlarga chek qo‘yildi. Ayblanuvchilarga nisbatan Jinoyat kodeksining 168-moddasi 4-qismi “a” bandi va 211-moddasi 3-qismi “a” bandi bilan ish qo‘zg‘atilib, “qamoq” ehtiyot chorasi qo‘llandi.
Qayd etilishicha, ko‘rilgan choralar natijasida aholiga ko‘mir mahsulotlarini o‘z vaqtida va imtiyozli narxlarda yetkazib berish ta’minlangan.
