Donald Trump mazkur bayonotni Truth Social ijtimoiy tarmog‘ida e’lon qildi. Uning so‘zlariga ko‘ra, AQSh milliy razvedka direktori Tulsi Gabbard "Rus ishi" deb ataluvchi masalaga oid yuzlab hujjatlarni oshkor qilgan. Trump ushbu materiallar Barack Obama Markaziy razvedka boshqarmasi (SIA) xodimlariga unga qarshi soxta ma’lumotlar tayyorlash bo‘yicha shaxsan ko‘rsatma berganini tasdiqlashini iddao qilmoqda.
Trumpning ta’kidlashicha, bu harakatlar amerikaliklarning saylov tizimi va 2016-yilgi saylovlar natijalariga bo‘lgan ishonchini susaytirish maqsadida amalga oshirilgan. U, shuningdek, sobiq prezidentni hibsga olish ehtimolini ham tilga olgan.
Mazkur bayonotlar AQSh Federal qidiruv byurosi (FBI) tomonidan Jorjiya shtatining Fulton okrugidagi saylov idorasida o‘tkazilgan tintuv fonida yangradi. Tintuv davomida 2020-yilgi saylovlarga oid hujjatlar musodara qilingani ma’lum qilinmoqda. Xabarlarga ko‘ra, tadbirlarda amaldagi ma’muriyat vakillari, jumladan, Tulsi Gabbard hamda FBI direktori o‘rinbosari Andrew Bailey ishtirok etgan.
Hozircha Barack Obama yoki uning vakillari tomonidan rasmiy izoh berilmadi.
