Uchrashuvda O‘zbekiston–Pokiston o‘rtasidagi ko‘p qirrali hamkorlikni yanada kengaytirish, do‘stlik va strategik sheriklikni mustahkamlashning joriy holati hamda ustuvor yo‘nalishlari muhokama qilindi.
Pokiston prezidenti Strategik hamkorlik kengashining birinchi yig‘ilishi muvaffaqiyatli o‘tgani munosabati bilan davlat rahbarini tabriklab, ushbu tashrif ikki tomonlama munosabatlarga yangi sur’at bag‘ishlashini ta’kidladi.
Tomonlar savdo-iqtisodiy va investitsion hamkorlik izchil rivojlanib borayotganini qayd etdi. Tovar ayirboshlash hajmi va qo‘shma korxonalar soni oshib bormoqda, iqtisodiyotning ustuvor tarmoqlarida kooperatsiya loyihalari amalga oshirilmqoda.
Yaqin istiqbolda o‘zaro savdo hajmini 2 milliard dollarga yetkazish bo‘yicha qo‘shma chora-tadbirlarni muvofiqlashtirish masalalari muhokama qilindi.
Shuningdek, hududlararo hamkorlikni rivojlantirishga alohida e’tibor qaratilib, Hududlararo forumning birinchi yig‘ilishini joriy yilda Xivada o‘tkazishga kelishib olindi. Xalqaro tashkilotlar doirasidagi hamkorlik, mintaqaviy va global masalalar yuzasidan pozitsiyalar yaqinligi tasdiqlandi.
