Manbaga ko‘ra, 6 fevral kuni Saburov Vnukovo aeroportiga kelganidan so‘ng unga Rossiyaga kirish taqiqlangani haqida rasmiy hujjat topshirilgan. Huquq-tartibot idoralari vakillari qiziqaning migratsiya va soliq qoidalarini buzganini ma’lum qilgan.
Ma’lum bo‘lishicha, Saburov 2025 yil may oyida ham xuddi shu ayblovlar bilan Sheremetyevo aeroportida ushlangan. O‘shanda unga 5 ming rubl jarima solinib, mamlakatni ixtiyoriy tark etish uchun ikki hafta muddat berilgan.
Nurlan Saburov Rossiyadagi eng mashhur standap-komiklardan biri hisoblanadi. 2022 yil bahorida Rossiyaning Ukrainaga bosqinini qoralamagani sababli AQSh va Isroilda uning kontsertlari bekor qilingan, 2025 yil oxiriga kelib esa Rossiyada ham chiqishlari taqiqlangan.
Xabarlarga ko‘ra, qiziqan Rossiyada umumiy qiymati 160 million rubldan ortiq ko‘chmas mulkka egalik qiladi. Shuningdek, u daromadlarini vositachilar orqali yashirishga urinishi, sanksiyalardan cho‘chib esa Rossiya fuqaroligini olishdan bosh tortgani aytilmoqda.
