9 fevral kuni Qozog‘iston Sog‘liqni saqlash vazirligi Nipah virusi bilan bog‘liq vaziyat yuzasidan bayonot berib, davlat chegarasidagi barcha o‘tkazish punktlarida sanitariya-karantin nazorati kuchaytirilganini ma’lum qildi. Bu haqda vazirlikka tayanib, Nur.kz xabar berdi.
Ma’lum qilinishicha, Nipah virusi bo‘yicha noqulay deb topilgan mamlakatlardan, jumladan Hindistondan kelayotgan fuqarolarga alohida e’tibor qaratilmog‘da. Bunday davlatlar ro‘yxati muntazam yangilanib boriladi. Xalqaro aeroportlarda esa jamoat salomatligi sohasidagi favqulodda vaziyatlarga tayyorgarlik bo‘yicha idoralararo o‘quv mashg‘ulotlari o‘tkazilmog‘da.
Shuningdek, tibbiyot muassasalarini yuqori tayyorgarlik rejimiga o‘tkazilgani, dori-darmonlar, shaxsiy himoya vositalari va dezinfeksiya vositalari zaxiralari shakllantirilgani bildirildi.
Avvalroq Hindistonning G‘arbiy Bengal shtatida Nipah virusi bilan kasallanishning besh holati aniqanganligi, ulardan uchtasi o‘tgan hafta qayd etilgani haqida xabar berilgan edi. Kasallanganlar orasida tibbiyot xodimlari ham bor.
O‘zbekiston Sanitariya-epidemiologik osoyishtalik va jamoat salomatligi qo‘mitasi ma’lumotiga ko‘ra, mamlakatda Nipah virusi bilan bog‘liq holatlar aniqdanmagan, epidemiologik vaziyat barqaror. Shu bilan birga, virus tarqalishi xavfi sabab Hindistondan hayvonlar va qushlarni olib kirish vaqtincha taqiqlangan.
