Qayd etilishicha, fuqaro O.L.S. tomonidan ixtiyoriy ravishda taqdim etilgan “30 SLIMMING” va “MAX SLIM” nomli jami 13 ming 470 dona mahsulot Bojxona qo‘mitasining Markaziy bojxona laboratoriyasiga ekspertiza uchun yuborildi. Xulosaga ko‘ra, ushbu vositalar tarkibida kuchli ta’sir qiluvchi modda — sibutramin mavjudligi aniqlandi.
Ma’lumki, sibutramin ayrim davlatlarda taqiqlangan modda hisoblanadi. Uni nazoratsiz qabul qilish yuraq-qon tomir tizimi faoliyati buzilishi, qon bosimi oshishi, insult va infarkt xavfining ortishi kabi og‘ir oqibatlarga olib kelishi mumkin. Ayniqsa, “ozdiruvchi vosita” sifatida yashirin tarzda sotilishi aholini, xususan ayollarni chalg‘itish orqali ularning sog‘lig‘iga jiddiy zarar yetkazish xavfini kuchaytiradi.
Tezkor tadbir davomida jinoyat zanjirini to‘liq fosh etish maqsadida “tezkor eksperiment” o‘tkazilib, mahsulotlarning asosiy manbaiga chiqildi. Natijada O‘rikzor savdo majmuasidagi bir nechta do‘konda qo‘shimcha ravishda 15 ming 504 dona shubhali dori vositalari borligi aniqlandi.
Jami 28 ming 974 dona, taxminiy qiymati 500 million so‘mlik dori vositalari, shuningdek tarkibida sibutramin mavjud “ozdiruvchi ayollar qahvasi” daliliy ashyo sifatida olinib qo‘yildi va tegishli protsessual hujjatlar rasmiylashtirildi.
Mazkur holat yana bir bor shuni ko‘rsatmoqdaki, noqonuniy aylanmadagi “mo‘jizaviy ozdiruvchi” mahsulotlar ortida inson salomatligiga jiddiy tahdid yotadi. Bojxona organlari tomonidan bunday holatlarning oldini olish bo‘yicha chora-tadbirlar izchil davom ettirilmokda.
