O‘zbekistonda 2026 yil 1 apreldan boshlan ayrim to‘lovlar faqat naqd pulsiz shaklda amalga oshiriladi. Ya’ni endi bank kartalari yoki elektron to‘lov tizimlari orqali hisob-kitob qilish tartibi joriy etiladi.
Bu haqda prezidentning 10 dekabrda qabul qilingan "Naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qo‘shimcha chora-tadbirlar to‘g‘risida"gi farmonida belgilangan.
Farmoniga muvofiq, quyidagi to‘lovlar naqd pulsiz shaklga o‘tkaziladi:
— davlat organlari tomonidan ko‘rsatiladigan xizmatlar uchun to‘lovlar;
— elektir energiyasi, tabiiy gaz va ichimlik suvidan foydalanganlik uchun hisob-kitoblar;
— alkogol va tamaki mahsulotlari uchun to‘lovlar;
— AYOQSHlar orqali neft-gaz mahsulotlarini sotib olish, shuningdek, elektromobillarni quvvatlash xizmatlari;
— qiymati 25 million so‘mdan yuqori bo‘lgan tovar va xizmatlar;
— ko‘chmas mulk ob’ektlari, shuningdek, ishlab chiqarilganiga 10 yildan oshmagan M, N, O va G toifasiga kiruvchi transport vositalari hamda maxsus avtotransportlarni sotish va sotib olish bilan bog‘liq bitimlar.
Hujjatga ko‘ra, 2030 yilgacha mamlakatda ikki muhim maqsadga erishish rejalashtirilgan. Ulardan biri — yalpi ichki mahsulotga nisbatan kuzatilmaydigan iqtisodiyot ulushini 1,3 baravariga qisqartirish. Ikkinchisi esa savdo va xizmat ko‘rsatish sohalarida aholi tomonidan amalga oshiriladigan naqd pulsiz to‘lovlar ulushini 75 foizga yetkazishdan iborat.
