Ma'lum qilinishicha, Viska kompaniyasi tahlilchilari o'tkazgan tadqiqotga ko'ra, Islandiyadagi narxlar Yevropa davlatlaridagi o'rtacha ko'rsatkichdan 84 foizga yuqori bo'lgan. Shu tariqa mamlakat bu borada Shveytsariyani ortda qoldirgan.
Tadqiqot mualliflari so'nggi 30 yil davomida Islandiya va Yevropa davlatlari o'rtasidagi o'rtacha narx farqi 42 foizni tashkil etganini, hozir esa bu ko'rsatkich qariyb ikki baravarga oshganini qayd etgan.
Ayniqsa, oziq-ovqat va go'sht mahsulotlari narxi qo'shni Shimoliy Yevropa davlatlariga nisbatan ancha yuqori. Xususan, oziq-ovqat mahsulotlari o'rtacha 44 foizga, go'sht mahsulotlari esa 71 foizga qimmatroq ekani aytilmoqda. Avtomobillar ham qo'shni davlatlarga qaraganda taxminan 40 foiz qimmat sotilmoqda.
Ekspertlar fikricha, bunday qimmatchilikka yuqori import bojlari va bozorda raqobatning pastligi sabab bo'lmoqda. Shuningdek, mamlakatda inflyatsiya Yevropa iqtisodiy hududidagi davlatlarga nisbatan ikki baravar tez o'smoqda.
Tahlilchilar inflyatsiya nazoratga olinmasa, mamlakatda xarid qobiliyati pasayishi, milliy valyuta qadrsizlanishi va eksport ko'rsatkichlari yomonlashishi mumkinligidan ogohlantirgan.
Ma'lumot uchun, eng arzon non sotiladigan davlatlar qatorida O'zbekiston ham qayd etilgan.
