Маълум қилинишича, Viska компанияси таҳлилчилари ўтказган тадқиқотга кўра, Исландиядаги нархлар Европа давлатларидаги ўртача кўрсаткичдан 84 фоизга юқори бўлган. Шу тариқа мамлакат бу борада Швейцарияни ортда қолдирган.
Тадқиқот муаллифлари сўнгги 30 йил давомида Исландия ва Европа давлатлари ўртасидаги ўртача нарх фарқи 42 фоизни ташкил этганини, ҳозир эса бу кўрсаткич қарийб икки бараварга ошганини қайд этган.
Айниқса, озиқ-овқат ва гўшт маҳсулотлари нархи қўшни Шимолий Европа давлатларига нисбатан анча юқори. Хусусан, озиқ-овқат маҳсулотлари ўртача 44 фоизга, гўшт маҳсулотлари эса 71 фоизга қимматроқ экани айтилмоқда. Автомобиллар ҳам қўшни давлатларга қараганда тахминан 40 фоиз қиммат сотилмоқда.
Экспертлар фикрича, бундай қимматчиликка юқори импорт божлари ва бозорда рақобатнинг пастлиги сабаб бўлмоқда. Шунингдек, мамлакатда инфляция Европа иқтисодий ҳудудидаги давлатларга нисбатан икки баравар тез ўсмоқда.
Таҳлилчилар инфляция назоратга олинмаса, мамлакатда харид қобилияти пасайиши, миллий валюта қадрсизланиши ва экспорт кўрсаткичлари ёмонлашиши мумкинлигидан огоҳлантирган.
Маълумот учун, энг арзон нон сотиладиган давлатлар қаторида Ўзбекистон ҳам қайд этилган.
